Opisyal nang gikoronahan ang bag-ong Miss Universe Philippines 2026 nga si Bea Millan-Windorski, human sa bag-o lang nahuman nga kompetisyon diin ang final question-and-answer portion nahimong sentro sa atensyon sa mga netizens.
Sa katapusang bahin sa pageant, gipangutana si Bea: “Daghang mga Pilipino ang nasagmuyo sa nasud. Para nimo, nganong angayan pa man nga irepresentar ang Pilipinas sa tibuok kalibutan?”
Sa iyang tubag, gipasabot niya ang iyang personal nga koneksyon sa Pilipinas ug ang iyang panan-aw sa serbisyo publiko ug pagpalambo sa mga oportunidad para sa mga Pilipino. “Ang Pilipinas usa ka butang ug usa ka lugar nga akong gihigugma sa tibuok nakong kinabuhi,” matod niya, samtang gipasiugda ang iyang pagtuo sa potensyal sa katawhang Pilipino ug ang panginahanglan nga molambo ang lokal nga oportunidad aron dili na kinahanglan mangita og trabaho sa gawas sa nasud.
Dugang pa niya, kung hatagan og kahigayunan, gusto niya nga magsilbi isip usa ka lider nga nag-una sa serbisyo publiko para sa tanan.
Human sa iyang pagdaog, nagpadala dayon og pahalipay ang mga kanhing Miss Universe titleholders nga sila Pia Wurtzbach ug Catriona Gray.
Si Bea ang magrepresentar sa Pilipinas sa Miss Universe 2026 nga ipahigayon sa Puerto Rico sa ulahing bahin sa tuig.
Bisan pa sa selebrasyon, nakamatikod ang pipila ka fans sa pageant sa pagkunhod sa focus sa Q&A portion kumpara sa miaging mga tuig.
