Mopataliwala usab sa ikatulo nga adlaw sa panaghisgot sa kalinaw tali sa Hamas ug mga negosyador sa Israel ang Punong Ministro sa Qatar ug usa ka delegasyon sa Turkiye nga nagtumong sa pagtapos sa gubat tali sa duha ka habig kaniadtong Miyerkules, Oktubre 8, 2025.
Kabahin kini sa dili direktang negosasyon tali sa Israel ug Hamas nga gipahigayon sa Red Sea resort nga lungsod sa Sharm El-Sheikh may kalabotan sa 20-point plan nga gisugyot ni US President Donald Trump.
Kaniadtong Martes, Oktubre 7 miingon si Trump nga ang mga negosyador sa US moapil usab sa mga pakigpulong gani gipakita usab sa Amerikanong Presidente nga adunay posibilidad nga makab-ot ang kalinaw sa Middle East ug ang tinguha nga buhian dayon ang tanan nga nahabilin nga mga binilanggo sa Hamas sa Gaza.
Matod ni Trump, buhaton sa Amerika ang tanan aron masiguro nga ang tanan motuman sa kasabutan, kung ang Hamas ug Israel mouyon sa usa ka ceasefire.
