Ipadayon sa House quad committee (quadcom) ang pagpahigayon og mga pagdungog sa mga interconnected nga isyu sa Philippine Offshore Gaming Operators (POGOs), illegal drugs, money-laundering ug extrajudicial killings (EJKs).
Matud ni House Committee on Human Rights chairperson ug Manila 6th District Rep. Bienvenido Abante Jr., co-chair sa quad-committee, niingon nga ang imbestigasyon sa Kamara kay nagpadayag sa usa ka lapad ug komplikado nga agianan nga nagkinahanglan og dugang nga pagsusi.
Bisan pa sa unom ka nangaging mga pagdungog sa marathon, si Abante miingon nga mas taas pa ang panahon aron mahibaw-an ang tanan nga kinahanglan nga ibutyag.
Gipahibalo usab ni Abante nga ang focus sa pagdungog sa Quadom karong semanaha mao ang EJK sa panahon sa Duterte administration.
Samtang, si Antipolo City 2nd district Rep. Romeo Acop, vice chair sa Quadcom, nipahimangno nga mapugos ang panel sa pagdakop kang Mylah Roque, asawa ni kanhi presidential spokesperson Harry Roque, kon dili kini motuman sa show-cause order nga gipagawas batok kaniya.
Kahinumduman nga ang asawa ni Roque wala motambong sa hearing niadtong Septiyembre 19 apan nipahibawo sa komite pinaagi sa suwat nga nagpatambal siya sa Singapore.
Si Harry Roque gilambigit sa mga ilegal nga POGO samtang ang iyang asawa giimbitar aron klaruhon ang iyang kalambigitan sa pagpirma og lease agreement sa mga Chinese national nga giingong nalambigit sa illegal hub sa Bamban, Tarlac.
