CEBU CITY-Ipatuman sa Cebu City Government ang quarantine pass system ngadto sa mga barangay atol sa pagpatuman sa enhanced community quarantine sugod karong Marso 28 sa udto.
Matud ni Mayor Edgardo Labella nga usa lang sa matag panimalay ang gitugutang makagawas aron makapalit sa mga nag-unang panginahanglanon ngadto sa groceries ug botika.Ipaagi sa matag barangay ang pagpang-apudapud sa mga quarantine pass ngadto sa matag tagbalay.
Nasayran nga adunay pipila ka mga barangay ang nagsugod na sa pagpanghatag og quarantine pass sama lang sa Brgy. Kamputhaw, Punta Princesa, ug uban pa. Nakalatid sa EO sa Mayor nga magikan sa City Gov’t ang quarantine pass ug dili ang barangay ang maghimo-himo og ilaha.
Samtang gitataw sa mayor sa dakbayan sa Sugbo nga sirad-an una ang mga establisimento nga wala namaligya og mga nag-unang palaliton inig patuman na sa enhanced community quarantine.
Apan adunay pipila ka mga patigayon ang magpabiling abli sama lang sa mga tambalanan, botika, gasolinahan, cargo handlers, ug uban pa.
Magpabiling abli usab ang pipila ka mga establisimento sugod sa alas-5 sa buntag hangtud sa alas-8 sa gabii, sama lang sa kan-anan nga maghatag og take out orders, merkado, supermarkets, panaderya, ug convenience stores.
Ipaubos ang entero dakbayan sa Sugbo sa enhanced community quarantine hangtud sa Abril 28.
