CENTRAL VISAYAS-Nangayo og tabang si Cebu Gobernador Gwendolyn Garcia sa mga kontraktor ug sand quarry permit holder sa pag-desilting sa Buswang River sa Barangay Cambang-ug, dakbayan sa Toledo aron di kini mobaha panahon sa kusog nga uwan.
Atol sa tigom karong semanaha uban sa mga quarry permit holders ug contractors, si Garcia naghisgot sa mga isyu sa encroachment niadtong gihatagan og industrial sand ug gravel permit sa Mines and Geosciences Bureau (MGB 7).
Nasayran,nga sukad miigo ang bagyong Odette sa Sugbo niadtong Disyembre 2021, ang mga naghupot sa permit nga sila si Lida Ruelo, Gimar Besaes, ug Earl Daniel Dumadag mihunong na sa pagmina og balas ug graba sa suba.
Gitataw ni Garcia nga bisan og gianunsyo na ang pagsugod sa El Niño sa nasud, nagpadayon gihapon ang pag-ulan.
Gihangyo sa gobernador ang mga stakeholders nga makig-alayon sa gobyerno human sa desilting operations.
Ang desilting usa ka proseso sa pagtangtang sa silt ug balas gikan sa suba nga maoy hinungdan sa pag-awas sa suba ilabina kon kusog ang ulan.
Kung dili masulbad ang problema, ang peligro sa pagbaha sa mga balay duol sa suba mahimong modako.
Tungod niini, pipila ka mga pribadong indibidwal ang misaad nga motabang sa RCV Construction sa pagkompleto sa mga kalihokan sa desilting.
