Mamuhunan og PHP4-billion para makatukod og 10 ka retirement facility sa nagkalain-laing dapit sa Pilipinas ang usa ka Japanese wellness company.
Ang pasiunang pasilidad nga tukuron sa Nambu Co. Ltd adto sa dakbayan sa Lapu-Lapu sa lalawigan sa Sugbo, matod sa Department of Trade and Industry (DTI) gahapong adlawa, Biyernes.
Ang pagpamuhunan gisuportahan sa CREATE MORE (Corporate Recovery and Tax Incentives for Enterprises – Maximize Opportunities for Reinvigorating the Economy) Act ug naglakip sa pagbansay sa mga Filipino caregiver aron makab-ot ang mga sumbanan sa Japan.
Ang CREATE MORE nagpalapad sa mga insentibo aron makatabang sa pagpausbaw sa ekonomiya, pagsuporta sa mga negosyo ug pagdani sa langyaw nga pamuhunan.
Ang mga detalye sa plano sa pagpamuhunan gituki atol sa tigum tali sa mga opisyal sa Pilipinas ug mga miyembro sa wellness company sa Osaka, Japan niadtong Huwebes, ang DTI nagkanayon sa usa ka press release niadtong Biyernes.
“This initiative aims to leverage the country’s skilled workforce to meet Japan’s labor needs while simultaneously boosting local employment,” ingon niini.
Si Trade Secretary Cristina Roque miingon nga ang pamuhunan nagsuporta sa tinguha sa gobyerno sa pagpausbaw sa mga high-value nga industriya, pagduso sa pagmugna og trabaho, ug pagpalig-on sa posisyon sa nasud isip usa ka premier retirement ug wellness destination sa rehiyon.
“This project is more than an investment — it is a partnership for dignity, wellness, and opportunity for our people. By combining Japanese expertise in eldercare with our natural advantages — warm climate, hospitable culture, and skilled workforce — we can make the Philippines a second home for Japanese and global retirees,”ingon niya.
