Sa dili pa ang tinuig nga selebrasyon sa Adoption and Alternative Child Care Week (AACCW), ang Regional Alternative Child Care Office (RACCO)-7 mihisgot sa kasagarang sayop nga pagsabot kabahin sa pag-sagop ug foster care sa usa ka forum sa Cebu City niadtong Miyerkules, Mayo 3, 2026.
Atol sa pagpakighinabi sa mga tigbalita, giklaro sa RACCO-7 ang mga kalahian tali sa duha ka konsepto isip kabahin sa mga paningkamot niini sa pag-usab sa mga kultural nga naratibo.
Subay sa tema karong tuiga, “Love Makes a Family,” gihisgutan sa RACCO-7 ang padayon nga mga inisyatibo sa ahensya sa pag-sagop ug alternatibong pag-atiman sa bata nga nagtumong sa paghatag og luwas ug maamumahon nga mga panimalay alang sa mga batang nanginahanglan.
Gipasiugda usab sa buhatan ang nausab nga demograpiko sa mga prospective adoptive parents ug mga proseso sa pag-sagop.
Gipaambit usab ni Social Welfare Officer III Lawrence Matthew Villaluz nga ang RACCO-7 karon nakigtambayayong sa “Meta Philippines” aron padayon nga mabantayan ang mga report sa Facebook nga giingong nalambigit sa mga online baby selling operations sa tibuok nasud.
Namatikdan sa buhatan nga ang mga indibidwal nga nalambigit sa susama nga mga kalihokan kasagaran mga ginikanan nga nanginahanglan og tabang.
Dugang pa ni Villaluz, nga aduna nay 6 ka mga facebook groups ang gibantayan nga namaligya og bata online, usa ka kaso niini ang naluwas og anaa na sa buhatan.
Ang pag-saulog sa AACCW karong tuiga pagasaulogon sa tibuok bulan sa Hunyo, uban ang nagkalain-laing mga kalihokan nga giandam, sa buhatan.
