Emosyonal nga gibutyag ni kanhi Miss Grand International 2024 Rachel Gupta ang rason sa iyang pag-resign isip titleholder.
Sa halos usa ka oras nga video nga iyang gi-release online human mi-resign sa MGI niadtong Miyerkules, giasoy ni Rachel ang iyang kalisdanan sa miaging 7 ka bulan isip MGI queen sukad sa iyang kadaugan niadtong Oktubre 25, 2024.
Iyang nahinumduman nga sukad sa iyang kadaugan, wala siya makadawat sa saktong pagtambal nga gisaad kaniya isip reigning queen, sama sa wala paghatagi og basic amenities. Sukwahi sa gisaad sa iyang “penthouse,” siya miingon nga siya gipapuyo sa usa ka gamay nga lawak sa hotel sulod sa kapin sa usa ka bulan ug unya gibalhin sa usa ka“ dilapidated house” usa ka oras o kapin pa gikan sa sentro sa siyudad, gikan sa MGI Hall sa Thailand ug wala hatagi ug sakyanan.
Siya usab miingon nga ang iyang saad sa pagbiyahe ngadto sa kapin sa 20 ka mga nasud wala matuman.
Dugang niana, ang organisasyon wala maghatag kaniya sa pagkaon ug mga batakang panginahanglan ug nga sa matag higayon nga siya mosulay sa pagpakigsulti sa organisasyon bahin sa iyang kahimtang, siya gihulga nga patangtangon sa trono ug blackmail.
Wala usab napugngan ni Rachel ang iyang kaugalingon nga tawgon ang MGI organizers og cold-hearted business people nga naghunahuna lang sa pagpangita og kuwarta.
Matud pa niya nga nakasinati siya og body-shaming. Wala usab siya makadawat sa iyang tibuok nga premyo ug kausa ra nahatagan og binuwan nga stipend ug nabuhi lamang pinaagi sa tabang sa iyang mga ginikanan.
Gihisgutan usab ni Rachel nga nagbaligya sila og “cheap products” sa TikTok sama sa mga salesgirl.
Giklaro usab ni Rachel ang mga pasangil batok kaniya sa organisasyon sa MGI kalabot sa iyang pagdumili sa pag-apil sa gikatakdang biyahe sa Guatemala.(Bombo Irene Ardiente)
