CEBU CITY — Giimbestigaran sa mga sakop sa PNP ang kamatayon sa usa ka magsisibya human gipusil sa mga riding-in-tandem kagabii sa Brgy. Daro, Dumaguete City.
Giila ang biktima nga si Cornelio Pepino, o mas nailang si Rex Cornelio, 48-anyos ug residente sa Boloc-Boloc, Sibulan, Negros Oriental.
Matud ni Police Lieutenant Allen June Germodo sa Dumaguete City PNP nga mopauli na unta si Rex gikan sa iyang duty sa usa ka FM station sa dakbayan kuyog ang iyang asawa.
Samtang nagbyahe ang magtiayon sakay sa ilang motor, ni-agi ang duha ka wala pa mailhing mga suspek sakay sa laing motor dayon og pusil ngadto sa magsisibya.
Daling gidala sa tambalanan si Rex human nakahiagom og mga samad-pinusilan sa managlahing bahin sa lawas apan namatay kini dayon.
Gipangita sa mga kapulisan ang mga suspetsado subay na sa nagpadayong imbestigasyon.
