CEBU CITY-Gipahibalo ni Cebu City Councilor Nestor Archival nga miduso kini ug ordinansahon nga nag-awhag sa mga nanag-iya ug mga dagko nga establisimento nga magbutang ug ‘rainwater catchment’ arun nga isawud ang mga tubig-uwan.
Matud pa, dako kini nga tabang sa pagsulbad o pag-menos sa problema sa baha sa dakbayan sa Sugbo.
Kini ang pamahayag sa konsehal human sa nasinati sa dakbayan nga grabi nga baha niadtong nakalabay nga Biyernes gumikan sa kusog nga uwan diin nag-overflow ang kasapaan ug gilunopan ang mga kadalanan diin nakahasol sa mga motorista ug daghang mga pasahero ang stranded.
Sigon ni Archival nga dugay na kini nga problema sa dakbayan apan hangtud karun kay wala pa gihapon kini kasulbaran.
Subay niini, gi-meeting ni Cebu City Mayor Michael Rama ang iyahang mga sakop nga gitahasan sa gubat sa baha ug basura arun nga ma-identify ang mga lugar nga grabing gibaha-an.
Ang maong mga areas ang tutokan sa pag-limpyo arun nga ma-menosan ang pagbaha kung ting-uwan.
