Pormal nang gitudlokan ang alyansa sa politika sa duha ka tag-as nga opisyal sa kagamhanang dakbayan sa Sugbo human mipahayag si Suspended Cebu City Mayor Michael Rama atol sa tapok-tapok niini sa iyang pundok nga wala na ang Rama-Garcia tandem nila ni Cebu City Acting Mayor ug incumbent Vice-Mayor Raymond Alvin Garcia.
Nahitabo ang maong pamahayag atol sa “Panagtigum” sa mga kaalyado sa politika ni Rama sa usa ka tanyag nga hotel sa dakbayan sa Sugbo kagahapong adlawa sa Martes Septiyembre 24, 2024.
Gihinay-hinayan pud niini sa pagpaila ang iyang mga line-up para sa konseho ug sa kongreso sa Partido BARUG, ang lokal nga political party ni Rama diri sa dakbayan sa Sugbo.
Kahinumduman nga nagsugod og pagtab-ang hangtud misalpot sa pait nga pag-atbang ang alyansa Rama-Garcia sukad nasuspenso ang Mayor sa dakbayan tungod sa kasong giatubang niini sa buhatan sa Ombudsman sa displakong suholan sa mga trabahante sa Cebu City Assesor’s Office.
Dugang pa nga nakapa-aghat nga laydo nga nilantawan ni Rama kang Garcia tungod sukwahi sa iyang mga polisiya nag mga lakang nga gibuhat sa Acting Mayor.
Matapos sa umaabot buwan sa Nobyembre ang suspension ni Rama nga naglangkob ug unom ka buwan uban sa pipila ka mga opisyal sa kagamhanang dakbayan.
Sa laing dapit, kasayran nga niadtong adlaw sa Lunes Septiyembre 23, nagpahigayon pud ug tapok-tapok ang lokal nga Partido sa politika ni Garcia nga “KUSUG: Kugi, Uswag Sugbo” sa pag-oathtaking sa mga nangambak nga konsehal nga kanhi alyado ni Rama.
