CEBU CITY-
Gikalipay ni Police Colonel Ireneo Dalogdog, ang director sa Cebu City Police Office, ang positibo nga komento ni Cebu City Mayor Michael Rama kalabot na sa presensya sa kapulisan sa dakbayan.
Matud pa, dako ang iyahang kalipay sa pamahayag sa mayor diin nagpakita lang sa ka-epektibo sa police deployment human sa sunod-sunod nga insidente sa pagpanulis ug pagpamusil.
Sa pagkakarun, gipadaghan pa sa CCPO ang mga pulis sa nagkadaiyang police stations sa dakbayan arun nga mabantayan gayud sa katawhan ang ilahang presensya.
Gawas pa, adunay 45 ka mga pulis ang ipakatap sa mga barangay prone areas sa dakbayan arun nga mao ang mag-organize sa mga barangay tanod, ingon man ang mupahigayon ug pagpangronda sukad alas 6 sa gabii hangtud sa alas 6 sa buntag.
Kahinumdoman nga una nang mipahimangno si Mayor Rama nga dili ihatag ang insentibo sa kapulisan kung magpadayon pa ang suliran sa krimen sa dakbayan susama sa pagpamusil pagpangawa o pagpanulis nga naghatag ug kahadlok sa katawhan.
