CEBU CITY- Mipadayag og lig-ong suporta si former Cebu City Mayor ug PDP-Laban Visayas Vice President Michael Rama kang Vice President Sara Duterte samtang nagpadayon ang panawagan sa impeachment batok niini.
Sa pakighinabi sa Bombo News Team, giingon ni Rama nga sa iyang pagtan-aw, adunay politikal nga motibo ang mga lihok batok sa Bise Presidente ug dili kini makatabang sa nasud nga nag-atubang na og daghang problema.
Matod niya, nagpadayon ang ilang pagsalig nga mopatigbabaw ang positibong resulta pinaagi sa pag-ampo ug pagsalig sa Ginoo.
Gipasiugda usab niya nga daghan pang mas importante nga isyu ang angay tutokan sa gobyerno imbes sa impeachment.
Gihagit usab ni Rama ang mga opisyal nga magdesisyon sa maong isyu nga unahon ang konsensya, interes sa katawhan, ug ang pagtahod sa Konstitusyon.
Gipasiugda usab sa kanhi mayor nga dili angay himuon nga sentro sa politika ang impeachment kay mahimo lamang kini makadugang sa tensyon ug pagkabahinbahin sa katawhan.
Dugang sa Mayor, nga nagpabilin siya sa iyang prinsipyo sa tibuok niyang political career ug wala siya mosulod sa “political marketplace.”
Nanawagan usab siya sa publiko, ilabina sa mga Sugboanon, nga magpabiling malinawon ug mag-ampo alang sa nasud aron mopatigbabaw ang hustisya, panaghiusa, ug maayong pang-gamhanan.
Sa iyang katapusang pamahayag, sa pangutana kon unsa ang iyang mensahe kang VP Sara Duterte, miingon si Rama nga mag-ampo ug mosalig sa Ginoo. Giingon niya nga “dili kini ang katapusan sa kalibutan,” samtang nagpadayag usab siya og pagsalig nga sa dili pa ang 2028, mahimo kining Presidente sa nasud.
Sa pikas bahin, sa pangutana kon nganong wala motambong si Cebu Governor Pamela “Pam” Baricuatro sa paglusad sa RAGE Coalition (Reform Alliance for Accountability, Good Governance, and Ethics) sa Cebu, ilabi na nga nailhan kini nga usa sa mga lokal nga opisyal nga hayagang mipadayag og suporta sa pamilyang Duterte atol sa miaging kampanya, miingon si Rama nga wala siya kahibalo ug wala silay komunikasyon kalabot niini.
