CEBU CITY-Miluwat og saad si Cebu City Mayor Michael Rama ngadto sa upat ka mga Cebuanong beterano nga gipasidunggan tungod sa ilang serbisyo sa World War II nga buhi pa hangtud karon.
Diin si Rama nagkanayon nga makadawat ang matag usa og usa ka higayon nga financial assistance nga P100,000 gikan sa Cebu City Government.
Kini ang gipahibalo ni Rama, atol sa usa ka programa sa Plaza Independencia diin naghandom sa ika-82 nga Araw ng Kagitingan, usa ka nasudnong pagsaulog sa kaisog ug kabayanihan sa mga sundalong Pilipino atol sa Fall of Bataan ug Death March sa mga kamot sa misulong nga mga pwersa sa Hapon atol sa Ikaduhang Gubat sa Kalibutan.
Giila ang mga bayani nga sila si First Lieutenant Vicente Bautista Echavez Jr., 107-anyos kinsang nagserbisyo niadtong 1941 hangtod 1946; si Private First-Class Cesar Guerreo Estalilla, 97-anyos, kinsa nagserbisyo niadtong 1944 hangtod 1945; ug si Private Josefina Arnejo Magno, 100-anyos, kinsa nagserbisyo niadtong 1942 hangtod 1945; ug Corporal Amelia Ortiz, 95, kinsa nagserbisyo sa panahon sa gubat gikan sa 1943 hangtod 1945.
