CEBU – Molupad na usab si Cebu City Mayor Michael Rama paingon sa Manila kay nagplano siya nga mohimo na usab og laing hugna sa “investment-begging”.
Kini ang iyahang gibutyag atol sa flag-raising ceremony sa City Hall karung adlawa Lunes, Septiyembre 12, nga gipaabot nga molarga siya sa kaulohan aron sa pagdani sa mga investor nga moanhi sa Sugbu.
Hinungdan nga iyahang gitahasan ang iyang executive secretary, nga si Atty. Collin Rosell, ug City Administrator Suzanne Ardosa sa pagdumala sa mga operasyon sa kagamhanan sa siyudad samtang wala siya.
Ang mayor nagkanayon nga nagplano sila nga dili lang mo-tap sa mga investors kon dili mangayo usab og tabang gikan ni Presidente Ferdinand “Bongbong” Marcos Jr.
Sa miaging buwan, si Rama, uban sa pipila ka mga ehekutibo sa City Hall, miadto sa Manila aron sa paghimo sa usa ka “investment-begging,” nga nahimong bahin sa mga tumong sa iyang administrasyon sa pagsundog sa Singapore.
