CEBU CITY-Gipasaka na ang mga reklamong kriminal ug administratiba batok kang Cebu City Mayor Michael Rama ug lain pang tulo ka opisyal atubangan sa Office of the Ombudsman-Visayas gumikan sa paggamit sa Cebu City Hall sa usa ka building nga gipanag-iya sa Metropolitan Cebu Water District (MCWD).
Kasong paglapas sa Article 220 o Illegal Use of Public Funds and Property sa Revised Penal Code ug Section 3(a) sa Republic Act 3019 o ang Anti-Graft and Corrupt Practices Act, Gross Misconduct and Conduct Prejudicial to the Best Interest of the Service, ang gipasaka batok kang Rama, Cebu City Administrator Collin Rosell, Department of General Services (DGS) head Rolando Ardosa ug Local School Board (LSB) officer-in-charge Kristian Hassamal.
Gipasang-at ni Jundel Bontuyan, ang maong mga reklamo sa Ombudsman niadto pang Agosto 11, 2023.
Si Bontuyan mao ang manager sa Cebu City Sports Center sa administrasyon ni anhing mayor Edgardo Labella.
Gipangayo niini sa iyahang reklamo ang preventive suspension nila ni Rama, Rosell, Ardosa ug Hassamal samtang nagdagan ang imbestigasyon.
Kahinumdoman nga mi-anunsyo ang Cebu City government niadtong Hulyo 21 nga abli na ang ilahang satellite office sa usa ka building nga gipanag-iya sa MCWD nga atbang sa City Hall.
Gi-okupahan sa usa ka retail store ang naasoy nga edipisyo nga gipanag-iya sa MCWD.
Una nang mibutyag si Atty. Rosell nga ang tanang buhatan ubos sa executive department nga dili policy-determining offices apan nahimutang sa Legislative Building, gibalhin ngadto sa satellite office, lakip na ang Division for the Welfare of the Urban Poor, ug ang City Hospitalization Assistance Management Program, ug uban pa.
Samtang, sayo ning buwana, ang management sa MCWD mibutyag nga wala pa’y kontrata nga napirmahan sanglit wala pa magkasabot ang MCWD ug ang kagamhanan sa syudad sa balayronon sa abang.
