CEBU CITY — Nakakuha og igong datos ang strategic rapid testing sa tulo ka mga dakbayan sa Sugbo ubos sa “Project Balik Buhay” bisan pa man og wala nakab-ot sa Cebu City ang target niini.
Human sa 15 ka adlaw nga pagpahigayon niini, nakakuha ang Cebu City og 85.61 percent o 15,012 gikan sa kapin 17,000 nga target residents ang nipaubos sa rapid testing.
Samtang nilapas ang Lapu-Lapu City sa ilang target og 162 percent samtang 119 percent usab sa Mandaue City sa maong kalihukan.
Matud ni Department of Health (DOH)-7 Chief Pathologist Dr. Mary Jean Loreche nga paigo na ang maong datos alang sa tinguha nga masuta ang pagkatakod sa makamatay nga virus.
Nasayran nga anaa sa 100 ngadto sa 200 gikan sa libuan ka mga rapid samples ang gipaubos sa swabbing.
Dugang pa ni Loreche nga batch-by-batch ang pagpagawas sa resulta sanglit gipaubos kini sa testing sa mga accredited nga laboratoryo sa Sugbo.
