CEBU CITY-Nanghinaut ang pamilyang Tocmo nga mutug-an ang suspek nga si Simeon ‘Gabro’ Gabutero kung si kinsa ang iyahang mga kauban sa pagpatay kang Reah Mae Tocmo.
Sa pakighinabi sa Bombo Radyo Cebu kang Rotche Tocmo, ang maguwang sa biktima, gibutyag niini nga ilahang gituohan nga dili lang si Gabro ang naghimo sa krimen gumikan kay basi sa sitwasyon ni Reah Mae, ang matang sa pagpatay kay dili lang mahimo sa usa ka tawo.
Gidugang pa niini nga daghan usab sa ilahang mga kabanay ug kaparyentihan ang giingong gipadamgo ni Reah Mae diin nagpakita nga samang gi-torture kini ug dili lang si Gabro ang naghimo.
Giingong ang tanang mga gipadamgo sa iyahang manghud kay nagtumbok sa tulo ka mga lalaki ug duha ka babaye nga nag-torture kang Reah Mae, apan dili maklaro ang mga nawung niini.
Matud pa, nasayod sila nga dili tanan ang mutuo og damgo, apan katingalahan nga tanan na lang nga gipadamgo ni Reah Mae susama lang og senaryo.
Nagkanayon si Rotche nga gusto lang nila nga makig-alayon kanila ang suspek nga si Gabro ug itug-an ang mga kauban niini sa pagpatay sa iyahang manghud, arun nga mahiluna na si Reah Mae nga kanunay magpadungog kanila nga nagdanguy-ngoy sa paghilak.
