Gideklarar sa Korte Suprema nga ang red-tagging, vilification, labeling, ug guilt by association usa ka hulga sa “right to life, liberty, and security” sa usa ka tawo.
Kini basi sa hukom sa Supreme Court En Banc nga gisuwat ni Associate Justice Rodil V. Zalameda diin gisuportahan niini ang pag-isyu sa writ of amparo ngadto sa aktibista ug kanhi Bayan Muna partylist Representative Siegfred Deduro.
Sa petition ni Deduro sa Writ of Amparo, niingon siya nga adunay presentasyon ang militar nga kabahin sa Communist Party of the Philippines – New People’s Army o CPP-NPA ug adunay pipila ka wala mailhing mga tawo ang nag-monitor kaniya.
Una nang gibasura sa Iloilo Regional Trial Court ang petition for a Writ of Amparo ni Deduro tungod kay dili igong rason ang red-tagging nga ikonsiderar nga adunay hulga sa iyang kinabuhi, kagawasan, ug seguridad.
Apan gisuportahan sa Korte Suprema si Deduro tungod nakit-an nila ang prima facie nga ebidensya kung diin giingon nga ang red-tagging naghulga sa kinabuhi, kagawasan, ug seguridad sa usa ka tawo.
Basi sa gipagawas nga desisyon sa Korte Suprema sa maong kaso, ang red-tagging mao ang hulga ug pagpanghulga aron mapugngan ang mga progresibong grupo.
Kini usab ang akusasyon nga ang usa ka tawo o organisasyon adunay relasyon sa usa ka komunista o teroristang grupo nga sagad masinati sa mga aktibista o miyembro sa mga progresibong grupo.
Sumala sa Korte Suprema, giila sa mga international organizations ang red-tagging isip usa ka matang sa harassent ug pagpanghadlok.
Gitumbok usab sa korte suprema nga kung ang usa ka tawo gi-red-tag, siya mahimong target sa mga vigilante, paramilitary groups, ug bisan sa mga ahente sa estado, mao nga gibati nila ang kahadlok nga mabutang sa peligro ang ilang seguridad ug kinabuhi.
