CEBU CITY – Usa ka dako nga kadaugan para sa Region VII ang nakuha nila nga 4th rank sa Palarong Pambansa 2018. Kung diin nakakuha ang Central Visayas ug 26 ka Gold, 25 ka Silver ug 36 ka Bronze.
Butang nga gikalipay ni DepEd Region VII Education Support Services Division (ESSD) chief Dr. Luz Jandayan ang nahimo nga resulta diin gikan sa ika-9 nga pwesto niadtong miaging tuig, anaa na karon sa ika-upat nga pwesto ang rehiyon.
Dako ang pasalamat ni Jandayan sa balaang bata sa Sugbo nga si Snr. Sto. Nino gumikan nga matud pa mi-uban kini kanila ug gidungog ang ilang pag-ampo nga madaog.
Nagpasalamat usab kini sa tanan nga mga atleta, mga delegado, ginikanan ug mga LGU nga mitabang para makuha ang maong kadaugan, ilabi na ang syudad sa Vigan, Ilocos Sur, kinsa maoy host sa Palarong Pambansa.
Gumikan nga matud pa tanan man nga ilang gikinahanglan, gihatag man ni Governor Ryan Singson diin usa sa mga rason nga nahimong nindot ang usa ka semana nila nga pag-istar sa Ilocus Sur.
