Na-alarma ang Regional Alternative Child Care sa mga child laborer nga makita gihapon sa kadalanan sa Dakbayan sa Sugbo, busa nihimo sila og pahimangno sa katawhan ugaling adunay makita sa gihisgutang aksyon, makigkooperar sa pag report niini sa awtoridad.
Sa nahimong pag badhas badhas sa Bombo Cebu Patrol team sa kadalanan sa Dakbayan sa Sugbo, aduna gihapon kini presensya sa mga batang nanginabuhi tunga tunga sa karsada bisan galagiting ang kainit o pagbunok sa uwan, diin nakahatag kini og dakong risgo sa ilahang kaugalingong kaluwasan.
Busa, gisaka kini sa Bombo Cebu team ang maong kabalaka ngadto sa buhatan, diin gibutyag ni Jeraldin Mendoza, Social Welfare Officer III (RACCO-7) nga gipaningkamotan nila ang pag-koordinar sa ubang mga kawani sa gobyerno, aron palig-onon ang “awareness” niining pag patrabaho sa usa ka bata, ug ingon man ang ubang mga problema kabahin sa kaluwasan sa mga bata, apil na niini ang “Online Baby Selling” nga gihimug-atan usab sa National Authority Child Care.
Gitataw usab niya nga aduna silay gitawag nga “Foster Care” diin mamahimong ang maong buhatan maoy mutubag sa panginahanglanon sa bata kung ugaling dili maka hatag og saktong pag-amuma ang ginikanan niini.
Sa datos nga gipakita SA RACCO-7, adunay kinatibuk-ang foster children under foster care nga 68 ka buok dinhi mismo sa rehiyon.
Kahinomdoman nga sa niaging Hunyo 12, gipahigayun sa Department of Social Welfare and Development field office VII, Department of Labor And Employment 7( DOLE), ug nipartisipar usab ang Regional Alternative Child Care 7 ( RACCO) sa gipahigayom nga World Against Child Labor, diin gipahugtan ang pagpahibalo sa ngadtu publiko nga hunungon ang child labor. | Bombo Irene Ardiente
