CEBU CITY — Kinahanglang iduso ang regional fishing agreement sa nasud aron maatiman ug protektahan ang bahandi sa kadagatan batok sa mga Chinese vessels.
Kini ang gisugyot sa political science professor sa University of the Philippines nga si Dr. Clarita Carlos subay sa nahimong insidente sa West Philippine Sea diin gibangga sa Chinese vessel ang barko nga sakay ang 22 ka mga Filipino fishermen.
Sa interview sa Bombo Radyo kang Carlos, kini nagkanayon nga mag-decide ang maong agreement kung kanus-a, unsaon, ug kinsa ang mangisda sa kadagatan sa nasud ilabi na nga gisugal niini ang soberanya sa Pilipinas.
Matud ni Carlos nga maglisud ang Pilipinas sa pagpakignegosyar sa China labi na kung ipahigayon ang back channeling talks tali sa duha ka mga nasud.
Dugang pa sa propesor nga magkinahanglan pa kini og mga kaalyado sama lang sa mga nasud sa Southeast Asia, Estados Unidos, ug uban pa aron maprotektahan ang soberanya sa nasud.
Samtang miingon usab si Carlos nga kinahanglang ipahigayon ang makuti nga imbestigasyon sa nahitabong panagbangga sa West Philippine Sea aron mapamatud-an kung unsa gayud ang nahitabo.
Nasayran usab sa maong propesor nga nailhan ang China tungod sa ilang kaisog ilabi na nga dugay nang gi-haras ang mga Pilipinong mananagat.
