PROVINCE OF BOHOL- Gitun-an karon sa Sangguniang Panlalawigan sa Bohol ang posibilidad sa pag-alsa o paglibkas sa ban batok sa pag-import og karneng baboy sa probinsya, uban ang pagpatuman sa mas hugot nga mga regulasyon aron malikayan ang posible nga pagkatap sa African Swine Fever (ASF).
Sumala ni 1st District Board Member Lucille Lagunay, nga maoy mangulo sa Committee on Agriculture, padayon pa gihapon ang ilahang deliberasyon kabahin sa mga lagda sa pagpasulod sa pork products sa Bohol, samtang nagpadayon ang hulga sa ASF sa nasod.
Lakip sa ilang gitun-an mao ang pag-import usab sa mga processed pork products sama sa hamonada, nga kasagarang gipangandaman sa mga Boholano ilabi na nga nagkadool na ang panahon sa Pasko.
Dugang pa ni Lagunay, ang mas istriktong mga regulasyon kabahin sa pagpasulod og karne maoy bahin sa ilang recovery efforts, human nga gipailalom sa “red zone” classification sa Bureau of Animal Industry (BAI) ug sa Department of Agriculture (DA) ang probinsya sa Bohol.
Subay niini, giapil usab sa tun-an sa komitiba ang pag-quarantine sa mga imported meats ug ang hugot nga inspeksyon sa mga lokal nga binuhing baboy aron malikayan ang pagsulod o pagbalik sa ASF sa probinsya.
