Gihagit sa House prosecution ang kampo ni Vice President Sara Duterte nga magpresentar og mga dokumento nga magpamatuod nga ang kapin sa P319 milyon nga mga remittance gikan sa China ug Hong Kong—nga nadawat sa Cale88 Foods Corporation—naggikan sa mga lehitimong transaksyon sa negosyo.
Matod ni House impeachment spokesperson former representative Ace Barbers, ang legal nga pagparehistro lamang sa kompanya—nga nalambigit sa bana sa Bise Presidente nga si Atty. Manases “Mans” Carpio—dili igo nga ebidensya.
Miingon siya nga kinahanglang magpresentar ang grupo sa depensa og tinuod nga mga rekord sa pamatigayon ug transaksyon aron ipasabot nganong nakadawat ang kompanya og maong kantidad.
Basi sa mga rekord nga gipresentar sa Anti-Money Laundering Council (AMLC) atol sa impeachment trial, ang mga remittance nga misulod sa Cale88 gikan sa mainland China ug Hong Kong miabot sa 319.33 ka milyon ka pesos.
Una nasab nga gipaambit sa AMLC ang tulo ka mga taho sa kadudahan nga transaksyon, diin walay klaro nga legal o komersyal nga obligasyon, katuyoan, o katarungan sa ekonomiya nga nakita.
Gipasiugda ni Rep. Barbers nga kinahanglang susihon pag-ayo ang gigikanan ug katuyoan sa maong mga pundo, tungod kay mahimo kining nalambigit sa mga alegasyon batok sa Bise Presidente mahitungod sa bahandi nga dili mapasabot ang gigikanan.











