LAPU-LAPU CITY,CEBU- Reklamong adunay kasuko ang gipadayag ni Lapu-Lapu City Lone District Rep. Junard “Ahong” Chan sa daw walay human-human nga mga infrastructure projects sa ilang dakbayan.
Kini ang gipadayag ni Chan pinaagi sa post niini sa iyang social media account nga gitawag pa atensyon sa Department of Public Works and Highways (DPWH) tungod kay nakamugna na kini og pagkabalda sa inadlaw-adlaw nga kinabuhi sa ga Oponganon.
Pipila lang sa mga gipunto ni Chan kay mao ang repair works sa dalan sa Marcelo Fernan Bridge (2nd Mactan Bridge) nga nakahatag og mas dugay nga oras sa byahe sa mga motorista pasulod ug gawas sa isla sa Mactan.
Lain proyekto nga gihisgutan ni Chan kay mao ang Ibo Skywalk diin ang skeletal metal frame kay anaa ra sa daplin sa dalan nga nakahatag pa og risgo sa publiko.
Sumala pa nga wala pa nasugdan ang pagtaud niini tungod kay adunay poste sa kuryente ang maigo og kinahanglan pa kini ibalin aron walay balda sa konstruksyon.
Gitawag sab niini ang atensyon sa Mactan Electric Cooperative (MECO) nga buhaton dayon kini sa daling panahaon aron masulbad na ang mga reklamo sa mga residente sa lugar.
Tataw sa kongresista nga kapila na kini nila ginatawag ang atensyon sa DPWH ug mga kontraktor sa maong mga proyekto apan tubagon lang daw kini sa mga pasaad nga hangtod karon wala matuman.
