Gikompirmar ni House Deputy Speaker Ronaldo Puno, nga si Cavite Rep. Kiko Barzaga nisulod sa buhatan ni House Majority Leader Sandro Marcos ug nihangyo nga suportahan siya aron mahimong house speaker.
Matud pa ni Puno nga sa pagsulod ni Rep. Barzaga sa buhatan sa Majority leader, iyang gisirad-an ang pultahan ug gimanduan ang tanan nga manglingkod ug maminaw kaniya bahin sa iyang plano nga mahimong house speaker gani miduol pa kini sa pipila ka mga magbabalaod ug giingnan nga himoon silang deputy speaker.
Tungod sa gihimo ni Barzaga sa buhatan sa Majority leader, nakugang ang tanan sa iyang gibuhat.
Matod ni Puno nga kalma ra usab si Marcos ug naminaw ni Barzaga ug wala siya gipapahawa sa opisina sa majority leader ug nagpaabot lang nga mogawas kini.
Gumikan sa gibuhat ni Rep. Barzaga, namatikdan ni Puno nga morag unwell ang magbabalaod nga taga Dasmarinas, Cavite tungod kay dili consistent ang iyang mga lihok sa isip usa ka opisyal sa gobyerno.
Nakit-an usab ni Puno si Barzaga sulod sa plenary meeting nga nakig-estorya sa mga magbabalaod ug nangampanya.
Matud ni Puno nga bisan og lisod alang kanila ang pagpasaka og ethics complaint, ila kining buhaton tungod kay nabutang sa peligro ang kredibilidad ug integridad sa Kamara.
Gitataw usab ni Puno nga duol sa NUP ang mga ginikanan ni Rep. Barzaga nga sila si kanhi Congresswoman Pidi Barzaga ug Dasmarinas Mayor Jenny Barzaga.
