Uyon si Akbayan Partylist Representative Percival Cendaña sa paghulagway sa prosecution nga si Atty. Michael Poa usa ka “abogadong walang alam”.
Atol sa pakighinabi sa Bombo Radyo Cebu, gipahayag ni Cendaña nga factual o sakto sa kamatuoran ang maong paghulagway basi sa mismong pamahayag ug testimonya ni Poa.
Gipasabo usab niini nga pila ka higayon nga miangkon si Poa nga wala siya’y gihawid nga impormasyon kung giunsa paggasto ang confidential funds sa Office of the Vice President (OVP).
Gitumbok usab ni Cendaña nga nagpakita kini og remissness of duties o pagpabaya sa obligasyon, tungod kay ang usa ka abogado o opisyal kinahanglan nga nasayod sa iyang gipirmahan nga dokumento, sama sa pagpasabot sa Commission on Audit (COA).
Subay niini, kusganong gibarugan usab ni Cendaña nga lig-on ug napamatud-an na sa prosecution nga adunay sayop sa paggamit sa confidential funds.
Dugang pagpasabot ni Cendaña nga klaro ang kalapasan basi sa mga gipagawas nga ebidensya, sama sa pag-withdraw og milyon-milyong piso gikan sa bangko pinaagi sa usa ka disbursement officer. Diin ang maong pondo gihatag ngadto sa tawo nga wala’y awtorisasyon subay sa gimando sa Bise Presidente, diin giisip niya nga usa ka dako nga impeachable offense.
