PROVINCE OF CEBU- Nagtanyag si Cebu 5th District Representative Duke Frasco og personal nga ₱500,000 nga reward alang sa bisan kinsa nga makahatag og katuohan nga impormasyon nga makapadayag sa anomaliya o iregularidad sa mga proyekto sa DPWH Flood Control sulod sa iyang distrito.
Ang maong lakang gimugna aron mapalig-on ang kampanya batok sa korapsyon ug masiguro ang transparency ug accountability sa mga proyekto nga gigastohan gamit ang pondo sa katawhan.
Gipahibalo ni Frasco nga ang makahatag og impormasyon nga mosangpot sa konkreto nga aksyon batok sa mga irregularidad makadawat sa maong ganti gikan sa personal niyang pondo.
Giawhag usab niya ang mga tawo nga adunay kasayuran nga direktang motaho pinaagi sa hotline 0956 279 4183.
Gipasabot sa kongresista nga kini nga inisyatibo nunot sa panawagan ni Presidente Ferdinand Marcos Jr. alang sa usa ka nasudnong imbestigasyon sa mga kwestyonableng flood control projects sa tibuok nasud.
Isip tubag, mihangyo dayon si Frasco sa DPWH Regional Office sa Central Visayas nga magsugod og usa ka hingpit ug komprehensibong pagsusi sa tanang flood control projects nga gipahigayon sa 5th District sa Sugbo.
Ang maong reward usa ka pagpamatuod sa seryosong paningkamot ni Frasco sa pagdumala nga limpyo, tinuod ug responsable, uban sa aktibong partisipasyon sa publiko.
