Gisuspinde ang rescue operations sa pagluwas sa upat ka mga tawo nga natanggong sulod sa gibahaan nga langob sa Laos hangtod Sabado sa buntag, sumala sa mga opisyal.
Ang paghunong sa operasyon gipatuman human malampusong naluwas ang usa ka survivor niadtong Biyernes sa gabii, nga nagtapos sa iyang siyam ka adlaw nga kalbaryo sa ilawom sa yuta.
Gikatakdang mobalik sa operasyon ang multinational rescue team alas-9:00 sa buntag (local time) human sa pagrepaso sa ilang estratehiya.
Ang upat ka biktima nagpabiling natanggong kapin 200 metros gikan sa entrada sa langob, nga nag-atubang sa delikadong 45-degree nga paubos nga agianan.
Nakit-an ang mga biktima nga nagpundok sa usa ka mas taas nga bahin sa bato ibabaw sa lubog nga tubig.
Bisan pa man nga luwas ang ilang kahimtang, giingong nag-antos na sa grabeng kagutom ug kakapoy ang mga natanggong. Samtang, duha pa ka kauban niini ang padayong gipangita.
Tungod sa kakuyaw sa sitwasyon, ang mga diver, lakip si Malaysian diver Lee Kian Lie, naghatag og basic training sa mga natanggong kung unsaon paggamit sa diving gear alang sa underwater evacuation.
Sa gawas sa langob, nagpabiling naka-standby ang mga emergency crew, heavy equipment, ug mga ambulansya nga andam mosugat ug mohatag og dinalian nga medikal nga tabang sa oras nga makuha ang mga biktima.
