PROVINCE OF BOHOL-Gikompirmar sa Bohol Committee on Environment and Natural Resources Protection nga ang Captain’s Peak Garden & Resort anaa sulod sa Chocolate Hills Natural Monument.
Sa pakighinabi sa Bombo Radyo Cebu, kang Board Member Atty. Jisselle Rae Villamor, Chairperson, Committee on Natural Resources & Environmental Protection, bisan og ang Chocolate Hills usa ka protected area, adunay mga pribadong yuta nga gipanag-iya niini.
Hinuon, si Atty. Villamor, nga bisan unsa pa ang pribadong pagpanag-iya sa pipila ka bahin, ang tanang construction sa lugar kinahanglang moagi sa Department of Environment and Natural Resources (DENR) pinaagi sa Protected Areas Management Board (PAMB).
Sa ilang imbestigasyon, nasayran nga niadtong tuig 2018 naaprobahan ang katukoran sa maong resort hinungdan nga nanawagan dayon ang Provincial Board ngadto sa Protected Areas Management Board nga usbon ang ilang desisyon.
Gidugang niini nga niadtong Septiyembre 2023, nagpadala sila og suwat ngadto sa DENR nga hunongon ang bisan unsang construction activity sa Chocolate Hills, apan wala silay nadawat nga opisyal nga tubag kalabot niini.
Gipahibalo usab ni Atty. Villamor nga wala pay Environmental Compliance Certificate (ECC) ang maong resort busa dili na angay ipadayon ang operasyon niini tungod kay nakalapas kini sa environmental laws.
Giklaro usab niini nga ang maong resort anaa sa Sagbayan, Bohol ug dili sa dakbayan sa Carmen diin nahimutang ang giingong viewing deck sa Chocolate Hills.
Kung kahinumdoman, nahimong init nga hisgutanan sa social media ang ‘Chocolate Hills’ tungod sa usa ka resort sa maong dapit, nga gituohan sa kadaghanan nga makaguba sa nindot nga talan-awon niining sikat nga tourist spot sa Pilipinas.
Ang resort, nakadawat og pagsaway gikan sa mga tawo nga nagduhaduha sa legalidad ug epekto niini sa usa sa UNESCO heritage geoparks.
