Cebu City- Giila na sa kapolisan ang responsable sa linuog nga pagpatay kang Reah Mae Tocmo, ang 19-anyos nga babaye kansang lawas napalgan nga gisulod sa karton sa Brgy. Tisa niadtung Hulyo 17,2023.
Gibutyag ni Police Colonel Ireneo Dalogdog, director sa Cebu City Police Office (CCPO), nga pasakaan og kasong murder si Simeon Gabutero Jr., construction worker.
Matod ni Dalogdog nga niluwat og extra-judicial confession si Gabutero human makita sa resulta sa DNA test nga ang mga sample nga nakit-an sa mga kuko ni Tocmo nitakdo sa mga kuko ni Gabutero.
Si Gabutero gi-tag kaniadto nga person of interest sa kaso.
Kahinumduman nga gisubay siya sa kapulisan human nitaho ang usa ka lalaki nga nipalit siya sa nawala nga smartphone ni Tocmo kang Gabutero.
Gi-angkon sa suspek nga si Simeon Gabutero Jr napatay niya si Rhea Mae Tocmo pinaagi sa pagtuok sa alas 6 sa buntag sa Hulyo 16, 2023, adlaw’ng Domingo.
Samtang, kahiubos ang usa sa gilantaw nga motibo sa mga kapolisan sa pagpatay sa biktima gumikan sa gitaho sa suspek nga nasuko og nagselos kini tungod sa pag-chat sa biktima ngadto sa lain-laing mga lalaki tungod sa trabaho niini ug matod pa sa suspek nga nahiubos siya kay dako na sya og nagasto sa biktima pinaagi sa pagpadala og gcash apan giingon nga wala kini padulngan.
Dugang pa, sila si Gabutero ug Tocmo nagkarelasyon sukad niadtong Disyembre 2022, hinungdan nga nagtuo ang kapolisan nga kini usa ka crime of passion.
Sa pikas bahin, nakaabot sa mga kabanay ni Tocmo ang balita sa iyang mangilngig nga pagpatay, nga wala lang nakapasuko sa mga responsable sa krimen apan nakurat sa pagkahibalo nga ania sa Sugbo ang 19-anyos nga babaye.
Nasayran nga dugay na nga nagpuyo sa Davao del Norte si Reah Mae sa wala pa kini nanimpalad sa Sugbo alang sa oportunidad sa trabaho nga gitanyag sa iyang higala nga si Jewel Smith.
Sa ulahi, nasayran sa mga imbestigador nga sa wala pa siya mamatay, nagtrabaho si Reah Mae sa usa ka bar ug restaurant sa Mandaue City pag-abot niya sa Cebu.
