Gisiguro sa mga namunuan sa Bombo Radyo Philippines nga himoong prayoridad ang serbisyo publiko ug pagdominar sa network sa natad sa pagpanibya pinaagi sa mga digital platforms.
Sa State of the Network Address ni Ms. Margaret Ruth C. Florete, ang President ug Chief Executive Officer sa network atol sa 2020 Top Level Management Conference sa Iloilo City, nagkanayon kini nga subayon sa network ang full transformation alang sa paghatud sa tinuod nga balita sa publiko ilabi na sa mga suking tigpaminaw sa Bombo Radyo.
Gawas sa “first, fast, and accurate” nga pagbalita, mas pahugtan pa sa network ang pagtabang pinaagi sa corporate social responsibility (CSR) projects sama lang sa Bombo Medico, Dugong Bombo, ug ang naghinangat nga Bombo Music Festival.
Subay niini, gisiguro sa network president nga sundon sa tanang mga empleyado ang ethical standards ug ang Code of Discipline alang sa pagbalita ug pagpakita sa professionalism.
Gihimug-atan usab ni Ms. Florete nga barugan sa Bombo Radyo Philippines isip gikasaligang sibyaanan nga madunggan sa radio set o mobile phones pinaagi sa Bombo Mobile Application.
Nasayran nga ang Top Level Management Conference mao ang tinuig nga panagtapok sa mga Senior Officer sa Network nga gipanguluhan sa Chairman Emeritus nga si Dr. Rogelio M. Florete, Area Managers, Station Managers, News Directors, ug Chief Technicians. (Bombo Iloilo)
