Gipahibalo sa Department of Justice nga ang kinatibuk-ang kantidad sa ‘restitution money’ nga nakolekta o natunol gikan sa mga anomalous nga proyekto sa pagkontrol sa baha moabot sa kapin sa 300 milyon ka pesos.
Sumala ni Justice Secretary Fredderick A. Vida, ang kinatibuk-ang gitawag nga ‘recovery of people’s money’ o ang pagbalik sa pondo sa publiko miabot na sa P316, 381, 500.
Miingon siya nga kini subay sa kasabutan tali sa departamento ug sa mga napili nga ‘state witnesses’ alang sa kaso nga may kalabotan sa pagkontrol sa baha.
Dugang nga gipaambit sa maong kalihim nga ang nakolekta nga ‘restitution money’ gikan sa kwarta nga gibalik sa upat ka state witnesses.
Kini sila mao ang kanhi Public Works Usec. Roberto Bernardo, Henry Alcantara, Gerard Opulencia ug kontraktor nga si Sally Santos.
Bisan pa, si Justice Sec. Vida miingon nga ang konsepto sa pagka-isip nga ‘state witness’ sa usa ka kaso dili lamang gibase sa kwarta nga ibalik.
Matod niya nga ang proseso sa ‘pagbawi sa kwarta sa katawhan’ o mas nailhan nga ‘pag-uli sa kwarta’ kabahin sa mga kondisyon nga gilatid ubos sa Witness Protection Program.
Giinsistir sa kalihim nga ang usa ka indibidwal dili awtomatikong ‘ma-abswelto’ sa kaso human mangawat og kwarta ug mauli kini.
Gikumpirma sa Department of Justice nga giuli ni kanhi DPWH Usec. Roberto Bernardo ang kantidad nga P35-milyon.
Sumala ni Justice Usec. Felix Ty, miingon siya nga kini gikan sa propiedad nga gibaligya sa kanhi opisyal nga usa lamang ka ‘downpayment’.
Gilauman nga kung madawat na ang balanse sa gibaligya nga propiedad, si Bernardo makauli na og mga P150-milyon sumala sa kasabutan.
