Gisumiter na sa Kamara ang resulta sa imbestigasyon sa COA sa intel ug confidential funds sa opisina ni Bise Presidente ug DepEd ubos sa pagdumala ni VP Sara Duterte.
Guman sa gihimo nga imbestigasyon sa Commission on Audit sa gikuwestiyon nga intelligence ug confidential funds sa buhatan ni Bise Presidente Sara Duterte niadtong 2022 ug confidential funds sa Department of Education sa dihang siya pa ang secretary sa buhatan sa DepEd.
Mao kini ang gitaho ni COA Chairman Gamaliel Cordova ngadto sa Kamara atol sa budget hearing sa Commission on Audit alang sa 2025 nga nagkantidad og P13.4 bilyones.
Sa interpelasyon ni House Deputy Minority Leader France Castro, matod ni Cordova, ang OVP ug DepEd misanong sa kamanduan sa pagsumiter og report kon giunsa paggamit ug paggasto ang intel ug confidential funds.
Lakip sa gisusi sa COA mao ang P125 milyones nga confidential funds sa OVP niadtong 2022 ug ang P150 milyones nga confidential funds sa Department of Education ug P500 milyones nga confidential funds sa OVP sa tuig 2023.
Sa budget hearing, si Castro nihimo og mosyon nga tungod kay dili man ipahibalo sa publiko ang resulta sa imbestigasyon sa COA, ipa-subpoena sa Kamara ang mga dokumento ug resulta sa imbestigasyon sa COA.
Sa laing bahin, ang buhatan ni VP Sara nihangyo sa House Committee on Appropriations nga iduso pagbalik ang petsa sa 2025 budget hearing ngadto sa Agosto 27 inay sa Huwebes, Agosto 15 apan ang OVP wala mohatag og katin-awan bahin niini.
