CEBU CITY — Patay ang usa ka retiradong pulis human misukol sa operatiba gikan sa Philippine Drug Enforcement Agency (PDEA-7) ug Cebu City Police Office (CCPO) atol sa search warrant operation kagahapon sa Sitio Hoyong-Hoyong, Brgy. Mambaling, dakbayan sa Sugbo.
Giila ni PDEA-7 Regional Director Levi Ortiz ang subject nga si retired SPO4 Alexander Dalion, 58-anyos, minyo, ug residente sa naasoy nga lugar.
Sa dihang nalutsan si Dalion og search warrant, nga giisyu sa Regional Trial Court, dali kining mibunlot sa iyang armas apan naunhan kini human gipusil sa operatiba.
Nakuha sa operasyon ang 200 gramus sa gidudahang shabu diin mo-balur kini og P1,360,000.
Nasignit usab sa mga kapulisan ang usa ka pistola ug uban pang non-drug evidence.
Matud pa ni Ortiz nga usa ka High-value target si Dalion ug dugay nang tiggamitan og drugas, sumala pa sa ilang case build-up.
Dugang pa niini nga konektado si Dalion sa grupo ni Jeffrey “Jaguar” Diaz, ang giilang drug syndicate sa Sugbo.
Base sa pagsaysay sa mga silingan, nangahadlok sila sa higayon nga mag-sige og pabuto si Dalion sa iyang pusil.
Nasayran usab nga napatay niini ang iyang igsoon niadtong nakalabay nga buwan apan wala nadayon sa pasaka og kaso ang pamilya niini.
Maka-dispose si Dalion og dili mominus sa usa ka kilo sa ginadiling drugas matag semana diin anaa sa dakbayan sa Sugbo ang areas of distribution.
Gidala sa tambalanan ang subject nga si Dalion human nakaangkon og samad-pinusilan sa iyang lawas apan namatay kini pagkataud-taud. /with reports by Bombo Eric Amaro and Bombo Joann Gantalao/ekp/gn
