Gipadayag sa Samahang Basketbol ng Pilipinas (SBP) nga si Rhenz Abando ang nag-unang gipili ni Gilas Pilipinas head coach Tim Cone aron moapil sa team alang sa fifth window sa FIBA World Cup Asian Qualifiers.
Matod ni SBP Executive Director Erika Dy, kanunay adunay listahan sa mga magduduwa nga giandam si Coach Tim.
Kon adunay dili makadula gikan sa maong listahan, aduna siyay mga alternatibo nga andam mopuli dayon—ug si Abando ang nag-una sa listahan sa coaching staff sa Gilas Pilipinas.
Gikuha si Abando aron ipuli sa bakanteng pwesto nila ni Carl Tamayo ug Calvin Oftana, kinsa dili makaapil sa torneyo nga ipahigayon sa Malaysia.
Si Tamayo dili makadula tungod sa naangkon kini og ankle sprain, samtang ang asawa ni Oftana gipaabot nga manganak na sa dili madugay.
Kini ang unang higayon nga modula ang 28-anyos nga si Abando ubos sa pagdumala ni Cone.
Kasamtangang nagdula si Abando sa Korean Basketball League, ug ang kataposan niyang pagdula alang sa Gilas Pilipinas nahitabo atol sa 2023 FIBA World Cup nga gipasiugdahan sa Pilipinas.
Ang Gilas gikatakdang makigsangka batok sa Syria ug Iran karong Nobyembre 27 ug 29.











