CEBU CITY-Giawhag sa konseho sa syudad sa Sugbo ang Executive Department partikular na ang City Health Department nga hugot nga ipatuman ang Cebu City Ordinance No. 2409 o ang Rice Conservation Ordinance of Cebu City taliwa sa nagkasaka nga presyo sa bugas.
Gibutyag ni Cebu City Councilor Mary Ann Delos Santos atol na sa ilahang regular session, nga dugay nang napanglantawan sa syudad ang importansya sa pagkonserbar sa supply sa bugas.
Ang City Ordinance No. 2409 kay nag-require sa tanang mga restaurants, schools, offices, hospitals, cafeterias, catering operations, fast food chains, ug uban pang mga related establishments nga maglakip og half rice serving sa ilahang mga menu.
Tumong sa maong ordinansa nga naaprobahan pa niadtong tuig 2014, ang pagdasig sa mga food establishments nga dili mag-usik sa bugas.
Si Delos Santos kauban si kanhi City Councilor Hans Abella ang nag-author sa naasoy nga ordinansa.
Ubos sa maong ordinansa, ang City Health Department ang gitahasan sa pagpatuman sa maong ordinansa, apan matud ni Konsehal Delos Santos, nga hangtod karun wala pa kini mapatuman sa syudad.
Subay niini, gitahasan sa konseho sa syudad ang City Health nga magpahigayon og inspeksyon sa mga food establishments arun nga masuta kung gisunod ang maong ordinansa.
