Gihimakak ni kanhi presidential spokesperson Atty. Harry Roque ang mga pasangil nga nanghilabot siya sa dagan sa kaso ni kanhi Presidente Rodrigo Roa Duterte sa ICC.
Unang niulbo ang isyu human ang legal counsel ni Duterte nga si Atty. Nicholas Kaufman, mihimo og pahayag sa usa ka written interview.
Nasayran nga si Roque gikatahong nagtrabaho aron kasuhan ang Dutch government tungod sa pagkatanggong kang FPRRD sa The Hague, Netherlands.
Gitawag pa kini sa abogado nga “crazy scheme” tungod kay kini nga mga lakang makapakomplikado sa kaso sa ilang kliyente.
Dugang pa niini nga mas maayo nga makigtambayayong sa Dutch Government inay mopasaka og kaso aron ang korte makahatag sa ilang interim release request.
Hinuon gipasabot ni Roque nga wala siya manghilabot sa kaso sa kanhi Presidente o moluwat og pamahayag nga makaapekto sa legal strategy sa ilang legal team.
