Gikompirmar sa Bureau of Immigration (BI) nga nibalik na sa Pilipinas si retired police colonel Royina Garma, ang kanhi general manager sa Philippine Charity Sweepstakes Office (PCSO) kinsa giimbestigahan sa giingong pagkalambigit niini sa drug war ni kanhi Presidente Rodrigo Duterte ug giingong mastermind sa pagpatay kang kanhi PCSO board secretary Wesley Barayuga niadtong 2020.
Niabot si Garma kagahapong adlawa sa Ninoy Aquino International Airport (NAIA) gikan sa Los Angeles, California gahapon sa gabii, Sabado, Septiyembre 6, diin ipaambit sa Immigration ang litrato ni Garma sa ilang opisyal nga Facebook page.
Kahinumduman nga nibiya si Garma sa nasod sa nunot sa imbestigasyon sa giingong mga pagpatay sa war on drugs sa administrasyon ni Duterte ug lakip sa nalambigit ang pangalan ni Garma.
Sa House Quad Committee inquiry, gibutyag ni Garma nga gimanduan siya sa kanhi Presidente nga mangita og opisyal nga mopatuman sa Davao model alang sa war on drugs sa tibuok nasod. Ubos niini, matud niya adunay reward money sa matag drug suspect nga mapatay.
Apan, si Garma na-intercept sa mga awtoridad sa California, USA niadtong Nobyembre 7, 2024 tungod sa iyang gikansela nga visa. Lima ka bulan human madakpi si Garma, ang iyang abogado niingon nga nangayo siyag asylum didto.
Kasamtangang nag-atubang si Garma og kasong murder ug frustrated murder kalabot sa iyang giingong pagmando sa pagpatay kang Barayuga.
