Gipahigayon naiadtong Huwebes, Hunyo 25, 2026, sa Regional Tripartite Wages and Productivity Board-7 (RTWPB-7) ang usa ka public consultation aron hisgutan ang kahimtang sa suholan sa mga mamumuo sa Central Visayas.
Lakip sa nakiglambigit uban ang mga mamumuo mao si Representative Rep. Eli San Fernando, representante sa Kamangagawa, diin mibutyag nga importante ang maong konsultasyon aron masuta kon ang kasamtangang minimum wage sa rehiyon igo pa ba sa nagkataas nga presyo sa mga palaliton ug serbisyo.
Gikuwestiyon niini ang pagpahigayon og public consultation RTWPB-7 ngadto sa mga mamumuo maylabut sa suholan diin gibutyag niini nga di kinahanglan ipangutana sa buhatan ang mismong hisgutanan gumikan kay dugay nang mihangyo ang mga mamumuo og pagpataas sa suweldo.
Dugang ni San Fernando, rason nga misapaka sila og baludnon nga House Bill 8081 o ang National Minimum Wage Act aron pagtinguha sa pag-establisar og usa ka hiniusa nga nasudnong minimum nga sweldo ug hinayhinay nga pagwagtang sa sistema sa regional wage board.
Gihimug-atan niini nga wala ray bili ang papahigayon sa buhatan og public consultation gumikan kay wala gihapon matubag sa RTWPB-7 ang mga panawagan sa mga mamumuo nga patas-an ang suholan, kung anaa man gane hatagan ra sa 20-30 pesos nga pagsaka.
Giklaro usab ni Rep. San Fernando, nga nakasabot siya sa hagit nga giatubang sa mismong buhatan, nga kinahanglan niining ibalanse ang interes sa mga mamumuo og mga anaa sa business sector, apan iyang gihangyo nga unta nakasabut ang kagamhanan kung asa naggikan ang mga mamumuo.
Mensahi usab niini sa gobyerno, nga ang mga mamumuo dili babag sa mga business sector, inay gusto sa mga mamumuo nga tabangan sa kagamhanan ang mga maumuo lakip na ang mga gagmayng negosyante nga makaluag-luag sa kalisod.
Samtang, ang RTWPB-7 mipasalig nga adunay wage increase nga ipatuman sa rehiyon apan wala pa kini magpahibalo kung pila ang kantidad sa posibleng umento tungod kay padayon pa ang pagtuon sa economic indicators ug sa mga rekomendasyon gikan sa labor ug management sectors.
