Nagbinayloay na usab ang Russia ug Ukraine og dagkong drone attacks tibuok gabii samtang susamang naglihok sa natad sa diplomasya sa wala pa ang giplano nga meeting sa Alaska tali sa Presidente sa US nga si Donald Trump ug Presidente sa Russia nga si Vladimir Putin.
Matud sa Ukrainian Air Force nga 100 ka Russian drones ang gilusad, diin ang nasud naka-intercept sa 70.
Samtang sa habig sa Russia nga napatumba nila ang 126 Ukrainian drones.
Tungod niini, temporaryo nga gisuspinde ang mga biyahe sa daghang mga tugpahanan sa Vladikavkaz, Grozny, Saratov, ug Kaluga.
Sa maong panghitabo, nakatala og usa ka tawo usab ang namatay ug daghan ang nasamdan sa Saratov, diin ang usa ka drone naigo sa usa ka residential area ug nakadaot sa oil refinery, sumala sa usa ka lokal nga opisyal.
Gikumpirmar sa Ukrainian General Staff ang pag-atake, nga giingng gipunting niini ang usa ka refinery sa lana nga gigamit sa mga pwersa sa Russia.
Giingon usab sa taho nga ang gidaghanon sa mga pag-atake sa drone sa Ukraine nagkadaghan kaniadtong Agosto. Gikataho nga napatumba sa Russia ang kapin sa 1,117 ka drone karong bulana.
Sa laing bahin, ang gidaghanon sa mga pag-atake sa drone ug missile nga nadawat sa Ukraine mikunhod kumpara sa Hulyo 2025.
Ang Ukraine mibarug usab batok sa “swapping of territory” proposal nga gihisgutan ni Trump, nga gisalikway dayon ni Ukrainian President Volodymyr Zelenskyy.
Giinsistir ni Kyiv nga dili nila biyaan ang teritoryo, dili modawat sa mga limitasyon sa ilang militar, ug dili mohunong sa ilang tinguha nga moapil sa NATO ug sa European Union.
Samtang, ang mga lider sa France, Germany, U.K., ug Poland mipirma og joint statement sa pagsuporta sa Ukraine. Giinsistir nila nga ang bisan unsang kalinaw kinahanglan adunay partisipasyon sa Ukraine, kinahanglan adunay usa ka hunong-buto, ug ang internasyonal nga mga utlanan kinahanglan tahuron.
