Mibisita sa Kursk Region sa unang higayon ang Presidente sa Russia nga si Vladimir Putin sukad gideklarar sa Moscow nga hingpit nga nabawi ang rehiyon human sa usa ka kalit nga pag-atake sa mga pwersa sa Ukraine sa miaging tuig.
Sumala sa state media sa Russia, si Putin nakigkita sa mga lider sa siyudad sa Kurchatov ug dayon mibisita sa Kursk nuclear power plant, nga kasamtangang gitukod.
Sa gipaambit nga video footage, makita si Putin nga nagsul-ob og suit nga nakigsulti sa mga local volunteers.
Giingon ni Putin nga ang mga pwersa sa Ukraine nga naningkamot gihapon sa pag-abante sa utlanan sa Russia.
Gimando usab ni Putin ang pagdugang sa gidaghanon sa mga “demining units” sa Kursk aron matabangan ang mga bakwit nga mga residente nga makabalik sa ilang mga balay.
Kahinumduman nga gipahibalo ni Putin sa miaging buwan nga nabawi sa iyang mga pwersa ang Kursk ug nag-uban sila sa mga sundalo sa North Korea sa away aron mabawi ang teritoryo.
