Kusganong misupak ang American singer nga si Sabrina Carpenter human gigamit sa White House ang iyang kanta sa usa ka online video nga nagpakita sa mga opisyal sa Immigration and Customs Enforcement (ICE) nga nangdakop sa mga indibidwal.
Ang video, nga gi-post niadtong Lunes, naggamit sa 2024 hit song ni Carpenter nga “Juno,” ug gipakita niini ang mga opisyal sa federal immigration nga nanggukod ug nangdakop sa mga imigrante. Kini adunay caption nga “nasulayan na ba nimo kini? Bye-Bye,” nga mao ang lyrics sa kanta ni Carpenter.
Wala nahimuot ang 25-anyos nga pop star niini, ug sa usa ka pahayag online, ang mag-aawit miingon nga ang White House dili angay mogamit sa iyang kanta alang sa dili tawhanon nga mga kalihokan nga gihimo sa administrasyon.
Samtang, ang White House mitubag dayon sa pahayag ni Carpenter, sumala ni Abigail Jackson, usa ka tigpamaba sa administrasyong Trump, nga ang White House dili mangayo og pasaylo sa pag-deport sa mga kriminal, ilegal nga imigrante, rapist ug pedophile.
Si Carpenter usa na karon sa daghang mga mag-aawit nga misupak sa paggamit sa White House sa ilang mga kanta sa mga kalihokan sa politika ug mga online post. Lakip kanila mao sila si Neil Young, ang Rolling Stones, ug bisan ang mga tawo ug lider sama ni Pope Leo XIV, kinsa nagpahayag sa ilang kabalaka sa pagdumala sa administrasyon sa mga palisiya sa imigrasyon.
