Dili makakumpirmar ang usa sa mga saksi sa depensa kung ang yuta nga gihisgotan, nga nahimutang sa Island Garden City of Samal, mao ba gayud ang propiedad nga gilista sa Statement of Assets, Liabilities, and Net Worth (SALN) ni Bise Presidente Sara Duterte.
Kini giangkon ni Island Garden City of Samal Assessor Engineer John Kenneth Enumerables atol sa iyang cross-examination nga gihimo sa pribadong piskal nga si Atty. Benjamin Tolosa Jr. sa nagpadayon nga impeachment trial.
Gipangutana ni Tolosa ang mga dili pagtugma o discrepancies mahitungod sa lokasyon, tuig sa pag-angkon, ug presyo sa maong propiedad.
Ang titulo sa yuta nagpakita nga nahimutang sa Barangay San Isidro; apan, sa SALN ni Bise Presidente Duterte alang sa tuig 2025, nakalista kini nga anaa sa Barangay Matanos.
Giangkon usab sa saksi nga ang iyang basehan lamang sa pag-ingon nga ang duha ka rekord nagtumong sa usa ra ka propiedad mao ang kamatuoran nga ang “assessed value” ug “market value” niini managsama.
Bisan pa niana, wala siyay laing dokumento nga mapresentar aron mapamatud-an nga ang duha ka rekord nagtumong gayud sa usa ra ka propiedad.
Aduna usab mga dili pagtugma tali sa kantidad sa pag-angkon nga nakalatid sa SALN ug sa presyo nga nakatala sa “deed of absolute sale,” ingon man sa tuig sa pag-angkon niini.
Gipresentar sa depensa ang maong saksi aron ipakita nga si Bise Presidente Sara Duterte, sa tinuod lang, nagdeklarar sa maong propiedad.
Ang mga propiedad nga gihisgotan kabahin sa mga ebidensya nga gipresentar sa House of Representatives aron suportahan ang mga alegasyon nga ang Bise Presidente adunay mga kabtangan nga mokabat sa labing menos 817.87 ka milyon ka pesos nga wala gideklarar ug bahandi nga wala mahatagi og katin-awan, sulod sa panahon gikan sa 2022 hangtod 2025.
