Gikumpirma ni Sam Verzosa ang bag-ohay lang nga pag-angkon ni Rhian Ramos bahin sa pagtapos sa ilang kapin sa upat ka tuig nga relasyon.
Sumala sa negosyante, puno sa kalipay ug gugma ang pipila ka tuig nga iyang relasyon uban ni Rhian — mga butang nga dili niya malimtan.
Bisan pa sa ilang panagbuwag, nagpabilin ang respeto ni Sam sa iyang kanhing uyab, lakip na ang pamilya niini.
Gipangutana usab siya bahin sa espekulasyon nga adunay third party nga nakaapekto sa ilang relasyon, human migawas ang ngalan sa Filipino-American content creator nga si Wil Dasovich, kinsa gidudahan nga bag-ong uyab sa aktres.
Miingon si Sam nga wala pa niya personal nga nakaila si Wil, apan nanghinaut siya nga maayo ang kahimtang niini. Sa direkta nga pangutana kung nasuko ba siya kang Rhian, tubag niya: wala.
Gihatagan niini og gibug-aton nga kon tinuod gyud nga gihigugma nimo ang usa ka tawo, dili nimo siya dauton bisan paman nga natapos na ang inyuhang relasyon.
Una na nga gikumpirma ni Rhian Ramos nga nagbulag na sila ni Sam Verzosa, niadtong Oktubre 2025.
Gihimakak usab niya ang mga espekulasyon bahin sa giingong relasyon niya ni Wil Dasovich.
