PROVINCE OF CEBU-Lauman ang mas istrikto nga mga lakang ug polisiya ang atubangon sa mga madakpan nga processor, trader, retailer ug contractor sa Sand and Gravel Operation sa probinsiya sa Sugbo.
Gipatawag ni Cebu Provincial Governor Gwendolyn Garcia ang mga stakeholders sa mga balas ug graba sa probinsiya diin iyahang gihimug-atan nga namatikdan niini nga gi-abusaran na ang mga lagda sa Kapitolyo sanglit dili mapugngan ang pagpadayon sa mga iligal nga kalihokan.
Subay niini, giduso sa gobernadora nga usbon ang mga probisyon sa ordinansa, diin mas gipatas-an na ug gipabug-at ang silot, ingon man mga regulatory fees alang sa mga retailers, traders ug dealers.
Basi sa maong probisyon, kung maabot na sa lima ka higayon nga nakalapas ang driver, tag-iya sa truck o permittee ug accreditee, ikanselar na sa Kapitolyo ang accreditation niini, blacklisted na ug pabayron pa og P1-million isip penalty.
Giklaro ni Governor Garcia nga ang matag salapi nga makolekta gikan sa mga madakpan kay mao ang gamiton isip pondo sa mga programa ug proyekto sa Kapitolyo, sama na lang sa pagpalambo sa mga tambalanan, pagpa-semento sa mga kadalanan, ug ang pagbutang og mga solar street lights lukop probinsiya sa Sugbo.
