Giabswelto sa Sandiganbayan ang kanhi hepe sa PNP nga si Alan Purisima ug 16 pa ka mga akusado kalabot sa giingong iregular nga kontrata sa PNP sa Werfast Documentary Agency, Inc. niadtong 2011.
Sa desisyon sa korte sa Sixth Division, ilang giingon nga ang prosekusyon napakyas sa pagpamatuod sa sala sa akusado, “beyond reasonable doubt.”
Mahinumduman nga ang kanhi hepe sa PNP giakusahan sa paglapas sa Anti-Graft and Corrupt Practices Act tungod sa pagpirma sa usa ka memorandum of agreement sa Werfast alang sa usa ka computerized firearms license renewal system.
Sumala sa prosekusyon, ang kontrata wala moagi sa public bidding ug ang Werfast dili kwalipikado isip usa ka courier firm, wala kini SEC registration ug permit gikan sa Department of Transportation and Communications, apan bisan pa, ang Sandiganbayan miingon nga walay pruweba sa konspirasyon ug walay igong pruweba sa aktuwal nga mga kadaot nga gipahinabo sa mga paglangan sa paghatud sa mga lisensya sa armas.
Gitangtang usab sa korte ang hold departure orders batok sa mga akusado ug gimandoan ang Bureau of Immigration nga tangtangon ang ilang mga ngalan gikan sa watchlist.
