Nakurat ang usa ka mahistrado sa Sandiganbayan sa gidaghanon sa gitaho nga mga sakit sa kanhing Kalihim sa Department of Public Works and Highways (DPWH) nga si Manuel Bonoan, kinsa usa sa mga akusado sa kasong plunder ug graft nga may kalabotan sa giingong mga anomaliya sa mga flood control projects.
Sa dokumento nga gibasa ni Sandiganbayan Presiding Justice Geraldine Econg sa Second Division, ang mga sakit ni Bonoan naglakip sa chronic kidney disease (CKD), cancer sa prostate, diabetes, hypertension, acute coronary syndrome, ug spine condition.
Diin karon, kasamtangag naka-confine ang kanhing kalihim sa DPWH sa The Medical City ug gikumpirma kini sa pulisya.
Tungod niini, ang korte miingon nga mangayo kini og updated nga medical report gikan sa Philippine National Police (PNP) aron mahibal-an ang tinuod nga kahimtang sa kanhing opisyal.
Si Bonoan nag-atubang og P573-milyon nga kaso sa plunder ug graft nga may kalabotan sa anomaliya nga mga proyekto sa pagkontrol sa baha, diin si Senador Jinggoy Estrada ug uban pang kanhing opisyal sa DPWH lakip usab sa mga akusado.
Sumala sa Office of the Ombudsman, ang kaso may kalabutan sa giingong kickback scheme sa mga proyekto sa pagkontrol sa baha sa Bulacan.
Base sa maong reklamo, si Bonoan giingong mitabang sa pagproseso sa “commitment fees” para kang Estrada, kinsa giingong nangayo og P855 milyon nga pundo para sa mga proyekto.
Gipunting usab sa prosekusyon nga ang senador giingong nakadawat og hangtod sa 25% o P213.7 milyon gikan sa kinatibuk-ang gasto sa mga proyekto.
Sumala sa mga piskal sa Ombudsman, si Bonoan giingong adunay papel usab sa pagpili sa mga kontraktor nga nakadaog sa maong mga proyekto.
Hugot nga gihimakak nila ni Bonoan ug Estrada ang tanang mga pasangil batok kanila.
