CEBU – Mupasaka ug kaso ang Sanlakas-Cebu batok sa lokal nga kagamhanan sa dakbayan sa Sugbo ingon man sa private entity nga New Sky Philippines, Inc. human sa gipirmahan nga joint venture agreement sa katukoran sa usa ka waste-to-energy (WTE) facility.
Gihimug-atan ni Sanlakas-Cebu Chairman Teody Navea nga iligal ang maong katuyoan sa dakbayan gumikan kay wala kini mahi-uyon ug makalapas sa Republic Act 9003 o Solid Waste Management Act.
Gipasabot ni Navea nga ang basi sa naasoy nga balaud gikinahanglan ang pag-‘segregate’ sa basura, ang malata, di-malata ug recyclable, apan sukwahi na kini sa WTE gumikan kay itapok na ang tanang basura una kini sunogon.
Matud pa, gawas nga makalapas kini sa balaud, giingong makadaut usab kini sa panglawas sa tawo ingon man nga hilabihan ka dako ang gasto niini.
Giingong gikinahanglan nga magamit sa insakto ang buhis sa katawhan ug dili ang paggasto sa usa ka pasilidad nga makadaut sa tawo.
Gibarugan ni Navea nga ilaha gayud kining barugan gumikan kay dugay nang panahon nga ilaha kining gipakigbisogan.
Hinuon, gitino niini nga walay sayop sa ambisyon ni Cebu City Mayor Mike Rama nga himuong Singapore-like ang dakbayan, apan gikinahanglan nga nunot sa kalamboan kay dili maapektohan ang katawhan ug kinaiyahan.
