Gipaboran sa Regional Trial Court (RTC) Branch 27 sa Dakbayan sa Lapu-Lapu ang petisyon nga makapyansa sa high-profile contractor nga si Cezarah Rowena “Sarah” Discaya ug sa kauban niining akusado nga si Czar Ryan Ubungen, ang acting chief sa Finance Section sa Department of Public Works and Highways (DPWH) Davao Occidental District Engineering Office.
Sa 15-ka-pina nga resolusyon nga gipagawas ni Presiding Judge Nelson Leyco niadtong Martes, Hulyo 7, 2026, nakita sa korte nga napakyas ang prosekusyon sa pagpresentar og lig-on nga ebidensya nga magpamatuod sa personal ug aktibong partisipasyon ni Discaya sa giingong sabot-sabot o kunsabo sa malversation sa pundo sa publiko pinaagi sa falsification sa mga opisyal nga dokumento.
Sa bahin ni Ubungen, ang kaso batok kaniya nag-atubang pa lamang sa mga pirma nga iyang gipatik sa mga disbursement voucher ug financial certification.
Gipahimutang sa korte ang kantidad sa pyansa nga P1 milyon alang kang Discaya ug P300,000 alang kang Ubungen samtang nagpadayon ang nag-unang trial sa maong kasong kriminal.
Samtang, gibalibaran sa korte ang petisyon nga makapyansa sa pito ka mga opisyal sa DPWH ug ni Timothy Construction President Roma Rimando tungod kay nagpabilin nga lig-on ang ebidensya sa salaod batok kanila.
Ang maong kaso nagsumikad sa mga pasangil nga peke nga gideklara sa mga opisyal sa gobyerno ug mga kontraktor nga nahuman na ang flood control project niadtong tuig 2022 aron ma-release ang pundo sa publiko bisan pa man sa kamatuoran nga wala nag-eksister ang maong estruktura sa aprobahang dapit sa Jose Abad Santos, Davao Occidental.
